भावफलकथनाध्यायः तन्वादिगतग्रहफलम्

१ । सूर्यभावफलम्

यदा लग्नस्थानं गतवति रवौ यस्य जनने

तपेत्कान्तावर्गान्निजसहजवर्गादपि मानः ।

वपुः कष्टं पित्तानिलरुधिररोगेण परमं

विदेशव्यापाराद् व्रजति धनमल्पत्वमभितः ॥ १ ॥

जनुः काले वित्तं गतवति यदा वासरमणौ

तदा भाग्यं तस्य प्रसरति कुटुम्बैः कलिरपि ।

शुभे वित्तापायो ह्यपि पथि तुरङ्गध्वनिरलं

गृहद्वारे दम्भाद् व्रजति शुभकृत्यं न परमम् ॥ २ ॥

तृतीये चण्डांशौ भवति जनने विक्रमकला-

प्रविस्तरो यस्यातुलबलमलं तीर्थगमनम् ।

विपक्षाणां क्षोभः सपदि समरे भूपकृपया

प्रतापस्याधिक्यं सहजगणतो दुःखमनिशम् ॥ ३ ॥

तुरीये मार्तण्डे नरपतिकुलादर्थनिवहः

भवेन्मानव्रातः कलिरपि च बन्धोः प्रसरति ।

विपक्षाणां युद्धे भवति विजयो जातु न भवेत्

तथा वित्तं पुंसां व्रजति न हि शान्तिं खलजनात् ॥ ४ ॥

यदादित्येऽपत्ये प्रथमतनयो याति विलयं

कुशाग्रा वै बुद्धिः कपटपटुतातीव वितता ।

प्रसक्तिर्मन्त्राणां प्रभवति रतिर्वञ्चनपरा

तथा तस्य क्रिडामयनिवहभोगेन निधनम् ॥ ५ ॥

दिवाभर्ता षष्ठे प्रबलरिपुहर्ता व्ययचयं

धराभर्तुर्दण्डाद्धितजनवचाच्चापि कुरुते ।

जनन्या गोत्रार्तिर्गजवृषतुरङ्गादिषु विपत्

प्रयाणे भिल्लाद्यैर्बहुतरविवादो जनिमताम् ॥ ६ ॥

प्रचण्डाशुः कामे जननसमये यस्य भवति

प्रियायाः सन्तापं सपदि कुरुते तस्य सततम् ।

तथा कष्टं देगे ह्यदि परमचिन्तामपि खला-

दनल्पव्यापारादपि च परमायाति न धनम् ॥ ७ ॥

मृतावर्के कर्केश्वरतनुसमा कान्तिविरतिः

क्रियाहीना बुद्धिः प्रभवति वसुक्षैण्यमभितः ।

गुदे रोगाधिक्यं खलु पुरवधूभिश्च रमणं

विदेशि संवासः कलिरपि जनैर्यस्य जनने ॥ ८ ॥

जनुः काले जन्तोर्नवमभवने वासरमणौ

बहिर्योगेनलं सकलजनपूज्यत्वमभतः ।

तथा चिन्ताधिक्यं भवति सहजैर्न्यमनुजैः

प्रवासादुद्विग्नं हृदयमपि तप्तं क्षितितले ॥ ९ ॥

दिनाधीशे राज्ये जननसमये तस्य जनके

जनयामार्तिः स्यादिह हि निबिडा यस्य सहसा ।

श्रमात् सिद्धिः सर्वा क्षितिपतिकृपाकीर्तिरतुला

कलत्रापत्याद्यैर्भवति विधुरा दुद्धिरनिशम् ॥ १० ॥

यदा लाभस्थानं गतवरि रवौ यस्य सततं

धनानामाधिक्यं क्षितिपतिकृपातस्तनुभृतः ।

प्रतापाग्नौ शश्वत् पतति रिपुवृन्दं च परितः

स्वपुत्रात्सन्तापो भवति बहुधा वाहनसुखम् ॥ ११ ॥

व्यये चेदादित्ये जनुषि नयने कष्टमधिकं

क्षितिर्मार्गेऽकस्मान्निजवपुषि पीडा च निबिडा ।

रिपूणां सङ्ग्रामे भवति विजयश्रीस्तनुभृतः

स्थितिर्नो चाञ्चल्याञ्जनकसहजार्तिश्च महती ॥ १२ ॥

२ । चन्द्रभावफलम्

क्रिये तुङ्गे स्वर्क्षे प्रभवति विलग्ने हिमकरः

विधत्ते सत्वाढ्यं नरमतुलमोदावृतमपि ।

गदव्रातैर्युक्तं जडमधममन्यर्क्षग उत

श्रिया हीनं नित्यं बधिरमपि सत्वैर्विरहितम् ॥ १ ॥

जनुः कोशागारं गतवति शशाङ्के तनुभृतां

धनार्द्धिः पद्माक्षीरतिरतिसुखं धान्यनिवहैः ।

भवेत्प्रीतिस्तुच्छा निजपरिजने विष्णुवनिता

समायाति स्वैरं निखिलभवनान्तः प्रमुदिता ॥ २ ॥

सहोत्थे शीतांशौ जनुषि बलिते विक्रमवशाद् 

धनान्यागच्छन्ति प्रवरवनितासङ्ग‌मसुखम् ।

प्रतापर्द्धिः पुसां सहजगणतः सौख्यमधिकं 

तपस्या संसारे बुधजननमस्या प्रभवति ॥ ३॥

सुखागारे चन्द्रो भवति सबलो यस्य जननेऽ-

धिकारो भाण्डारे प्रबलवसुधाभर्तुरनिशम् ।

वयस्याद्ये किञ्चित् सुखमपि ततो नूतनलता 

विलासः पुत्राणां सुखमलमलङ्कारनिवहैः ॥ ४ ॥

जनुः काले चन्द्रो भवति यदि सन्तानभवने 

तदा पुंसः कान्तासुतसुखमलङ्कारनिकरैः ।

सदा हृद्या विद्या नरपतिकुलादेव वसुधा-

दुकूलार्थाः स्वैरं धनमपि कुसीदेन नितराम् ॥ ५ ॥

अरिस्थाने चन्द्रो भवति सकरो जन्मसमये

प्रतापाग्नौ शत्रुर्ध्वलति परितस्तस्य परतः । 

पुनर्भूयादद्धा रिपुरिह जितोऽपि क्षितितले 

सुखं मातुः स्वल्पं प्रभवति गदानामतिरतिः  ॥ ६ ॥

यदा कान्तागारं गतवति मृगाङ्क जनिमतां 

कराक्रान्तेऽकस्माद्धनमपि भवेत् स्त्रीजनकुलात् ।

अनङ्गप्राबल्यं वरनगरनारीरतिकला 

प्रवीणो वै धीरध्वनिमतिरतीव प्रभवति  ॥ ७ ॥

यदा मृत्युस्थानङ्गतवति शशाङ्के बलयुते

महारोगातङ्कः प्रबलरिपुशङ्का च भवति । 

क्वचित् क्वाथं मुद्‌गोदकमपि पचन्तीह भिषजः 

सदा सद्वैद्यानां कलकलरवस्तस्य सदने  ॥ ८ ॥

तपः स्थाने राकापतिरिह यदा जन्मसमये 

स्तुवन्ति व्यामोहात् प्रबलरिपवश्चापि कृतिनः ।

तमर्थानामाप्तिः परमकमनीयं मुखमलं

सुखं चाङ्गे राकापतिवदमितं तस्य सततम् ॥ ९ ॥

यदा कर्मस्थानङ्गतवति तमीशे जनिमतां 

स्वबन्धुभ्यः सौख्यं नरपतिकुलादर्थनिचयः ।

नवीनाभिर्नित्यं नगरवनिताभिः सुरतजं 

सुखं पूर्वापत्ये प्रभवति सुखं नैव सततम् ॥ १० ॥

तमीभर्ता लाभे भवति जनने यस्य सबल-

स्तदा पृथ्वीभर्तुः प्रभवति धनानामधिकृतिः । 

श्रियः श्रेणी बाला लसति सदनान्तः प्रमुदिता

प्रतिष्ठा काष्ठान्तं व्रजति विभुता भूपतिकृपा ॥ ११ ॥

व्ययस्थानं याते जनुषि रजनीशे जनिमतां

रिपोर्भीतिश्चिन्ता नयनयुगले रोगपटली ।

विचिन्त्या यज्ञादौ व्ययचय उतान्तं पितृकुलात्-

तथा मातुर्वंशात्प्रभवति विषादश्च सुरतात् ॥ १२ ॥

३ । कुजभावफलम्

धरापुत्रे लग्नं गतवति यदा जन्मसमये 

प्रहारो लौहास्त्रादनलशरदण्डादपि भयम् ।

विनाशो भार्यायाः शिरसि नयने रोगपटली 

प्रतापस्तस्यापि प्रभवति मृगेन्द्रेण च समः ॥ १ ॥

कुटुम्बे माहेयः प्रभवति यदा यस्य जनने 

प्रलब्धे वित्तेशे स्वजनवशतः किं फलमलम् ।

यथा मुक्ताहारं क्षितिपतिजनैरर्पितमिमं 

गले सूत्रायन्ते सततमभितो मर्कटगणाः  ॥ २ ॥

यदा गोत्रापुत्रे प्रभवति सहोत्थे तनुभृतां 

बलं बाह्वोः पूर्णं निजभुजबलेनैव सदने ।

स्थिराः विष्णोः कान्ता लसति सहजे कष्टमधिकं 

तपश्चर्या वर्या भवति च सपर्याविधिरपि ॥ ३ ॥

चतुर्थे भूपुत्रे भवति जनने यस्य सबलः

किमन्ये रव्याद्याः सततमनुकूलास्तनुभृतः ।

 सुहृद्वर्गात्सौख्यं प्रभवति न किञ्चिन्निजगृहात् 

त्रपा शत्रोः क्षोणीनरपतिकृपावस्त्रपटली  ॥ ४ ॥

अपत्ये क्ष्मापुत्रे भवति जठराग्नेः प्रबलता 

न सन्तानो जीवत्यपि यदि च जीवत्यपि गदी ।

सदान्तः सन्तापः खलु मतिरनल्पाघन्चिये 

कृतेऽपि स्वर्गाप्तिर्नहि जनिमतामर्थनिवहः  ॥ ५ ॥

यदा शत्रुस्थानं गतवति कुजे जन्मसमये 

पलायन्ते भीताः सपदि समरे शत्रुनिवहाः ।

विचारज्ञा प्रज्ञा भवति न सुखं मातुलकुले 

विलीयन्ते चार्थाः पुनरपि परार्थाप्तिरभितः  ॥ ६ ॥

कुजे कान्तागारं गतवति जनोऽतीवलघुताम् 

समाधत्ते युद्धे प्रबलरिपुणा सक्षततनुः । 

तथा कान्ताघाती परविषयवासी खलमति

र्निवृत्तो वाणिज्यादपि परवधूरङ्ग‌निरतः  ॥ ७ ॥

क्षमापुत्रे मृत्यौ कविगुरुबुधाः किं तनुभृतः 

प्रकुर्युर्ये चान्ये प्रभवति विधानेऽपि नितराम् । 

खलायन्ते तस्य स्वजननिवहाः किं न सहसा 

प्रयत्ने यातेऽपि प्रवरगदजा विघ्नपटली  ॥ ८ ॥ 

यदा भाग्यस्थानं गतवति कुजे जन्मनि मति 

र्महोग्राभाग्याद्वै धनमपि महोग्रं तनुभृताम् । 

तथा ज्येष्ठः श्यालो नहि सहजसौख्यं च परितः । 

कृतेत्युद्योगे स्यान्नतु फलविपाकः खलु भृशम् ॥ ९ ॥ 

यदा कर्मस्थानं गतवति कुजे यस्य जनने

क्षमाभृत्यग्रामक्षितिपतिकुलावाप्तविभवः । 

स्वतः सिद्धः शश्वत्प्रभवति समन्तात्परमसौ 

प्रतापव्रातेन व्रजति सहसा सिंहसमताम् ॥ १० ॥ 

यदाये माहेयः प्रभवति बलादेव समरे 

जयति युद्धे शत्रून्नपि सुतविषादेन विकलः । 

धनग्रामक्षोणी चपलतुरगानन्दकृदसौ 

परार्थव्यपारात्क्षतिमभितरामेव लभते ॥ ११ ॥ 

कुजोऽपाये यस्य प्रभवति यदा जन्मसमये 

सदा वित्तापायं सपदि कुरुते तस्य सततम् । 

कलङ्कप्रख्यातिं पिशुनजनतश्चौरकुलतो 

भयं वा शस्त्रादेरपि रिपुकृतं दुःखमधिकम् ॥ १२ ॥

४ । बुधभावफलम्

यदा लग्नस्थाने हिमकरसुते यस्य जनने 

न किं सर्वारिष्टं विहगजनितं गच्छति लयम् ।

सदा रूपं चामीकरनिभमलङ्कारलसितम् 

प्रतिष्ठा संसारे प्रभवति वरिष्ठा तनुभृताम् ॥ १ ॥

विधोः पुत्रे वित्ते प्रवरमतिरज्ञोऽपि कृतिना

समाजस्थो वाचस्पतिरिव सदा भासत इति ।

प्रतापी गीतज्ञो भ्रमर इव भोगी क्षितितले 

महोदारः शश्वत्सुरतरुरिव श्रीपतिसमः  ॥2 ॥

तृतीये यस्य ज्ञे प्रसरति वणिक् वृत्तिरभितः 

सदा दुर्वश्यानां भवति च वशित्वं निधिधिया ।

सुखानामाधिक्यं निजसहजवर्गानुसरणात्त-

तोऽन्ते वैराग्याद्विषयपटली गच्छति लयम् ॥3 ॥

चतुर्थे यस्य ज्ञे प्रवरजनमैत्री क्षितितलेऽ-

धिकारोऽपि द्वारे भवति सुधाभर्तुरभितः ।

तदाज्ञातः सर्वैर्निजपरिजनैर्लिख्यत उत 

प्रयत्नात्तद्वाक्यं किमपि न सुखं पैतृकधनात् ॥4 ॥

तमीभर्तुः पुत्रे गतवति जनुः पुत्रभवनं 

वयस्याद्ये यस्य प्रथमसुतगर्भक्षतिरपि ।

मनीषा सद्वित्तव्यवहृतिविधेरर्थचतुरा 

खलस्य व्यासङ्गात्कपटपटली नृत्यति मुखे  ॥5 ॥

विरोधो बन्धूनामरिगणनिरोधस्तनुभृतां 

रिपौ ज्ञे वायूनां प्रभवति विकारोऽपि जठरे ।

यतीनां सम्बोधः सपदि शुभमार्गे व्ययचयः 

वराणां रत्नानां व्यवहृतिरतीवार्थजननी  ॥6 ॥

बुधे दारागारं गतवति यदा यस्य जनने

त्ववश्यं शैथिल्यं कुसुमशररङ्गोत्सवविधौ ।

मृगाक्षीणां भर्तुः प्रभवति यदाऽर्केण रहिते

तदा कान्तिश्चञ्चत्कनकसदृशी मोहजननी  ॥7 ॥

मृतावब्जापत्ये प्रभवति यदा जन्मसमये 

चिरं वै जीवित्वं निजपरपुरे तस्य सहसा । 

प्रविख्यातिः शश्वन्नरपतिकुलादर्थन्चियः 

परस्त्रीभिः क्रीडा सुरतजनिता यस्य सततम्  ॥८ ॥ 

बुधे धर्मस्थानं गतवति सुधर्मा बुधवरो 

नरो गङ्गाभक्तो यजननिरतः सद्भिरभितः । 

पताका वंशस्य प्रभवति नरेशादपि सदा 

प्रतापी सन्तापी पिशुनमनुजानां धनपतिः  ॥9 ॥ 

बुधे कर्मस्थानं गतवति यदा जन्मसमये 

पितुर्वित्तव्रातैः सुखमतितरामश्वपटली 

गजश्रेणीभृत्यप्रवरमणिशालाम्बरचयः 

परानीतिः क्षोणीपतिविहितवृत्तिस्तनुभृतः ॥10 ॥ 

कुतः कन्यादानं भवति सदने लाभभवने 

विना ज्ञं वित्ताप्तिः कथमृणविमुक्तिः कथमपि । 

समन्ताद् भूदेवाः कथमपि वितृष्णाश्च भविनां 

कथं रूपं दिव्यं कथमरिकुलार्थापहरणम्॥ ११ ॥ 

बुधेऽपाये यस्य प्रभवति न चेत्तस्य सदनं 

कथं विज्ञव्रातो भजति परितोऽपि द्विजगणः । 

कथं युद्धे यान्ति प्रबलरिपवो वा विमुखताम् 

कथं कोषापायः प्रवरयजने तीर्थविषये ॥ १२ ॥

५ । गुरुभावफलम्

६ । शुक्रभावफलम्

७ । शनिभावफलम्

८ । राहुभावफलम्

९ । केतुभावफलम्